محمد زكي الشيمي : اللي حصل في السعودية النهاردة كان متوقع من مدة طويلة يمكن الاستثناء بس كان في خشونة التعامل مع الوليد بن طلال
لكن المشهد مفهوم لأي حد عارف تفاصيل المشهد السعودي .
متعب بن عبدالله ورث عن ابوه قيادة الحرس الوطني اللي كان بينظر له من سنة ٨٢ انه قوة خاصة جاهزة للتحرك لو انفرد السديرين السبعة بالحكم وفضل نقطة توازن مهمة
وليد الابراهيم صاحب ام بي سي هو شقيق الجوهرة بنت ابراهيم أرملة الملك فهد وأبناء فهد عموما موقفهم من انفراد فرع سلمان بالسلطة هو رفض يتم التعبير عنه برفض التحديث .
الوليد بن طلال ابن الأمير طلال المعروف انه كان ممن انشقوا عن النظام السعودي في الستينات ولجأوا لعبد الناصرومعروف انه رفض نظام البيعة لما تجاوزه في عهد الملك عبد الله نفسه واستقال من هيئة البيعة ، الوليد كمان ملياردير وعلاقاته واسعة وأفكاره حداثية و ابن مني الصلح بنت رياض الصلح رئيس وزراء لبنان الأسبق .
دول هما الهدف الرئيسي والباقيين اهميتهم اقل ، اتهامهم بالفساد قد يكون صحيح لكنه مش السبب الاساسي للي حصل لهم ، بقية الامراء اللي تم توقيفهم معروفين بالولاء لنايف بن عبدالعزيز وابنه ولي العهد السابق محمد بن نايف، الوزراء السابقين وبقية المسؤولين بعضهم معروف جدا انه فاسد فعلا .
لكن بعض صفقات الفساد اللي تم توقيف البعض علي خلفيتها عمرها اكتر من تلاتين سنة زي صفقة اليمامة اللي كانت في اواسط التمانينات واللي كان معروف ان شابها فساد كبير .
فببساطة العملية تمت بحيث تجمع مجموعة من المعروفين بفسادهم مع مجموعة من المتهمين بالفساد مع مجموعة امراء ذوي نفوذ كان مسموح بفسادهم اصلا .
المدهش بقي انه وبنفس طريقة تعيين عادل الجبير وزير للخارجية واخراج المنصب من دائرة احتكار آل سعود فعدد معتبر من اللي اتعينوا في مناصب بدل الموقوفين هم مواطنين عاديين مش من آل سعود برضه .
فببساطة الرسالة الموجهة للجمهورهي هنضرب الفساد ونفتح الابواب علي العالم وهنفتح للمواطن العادي باب الترقي دون حدود بشرط الكفاءة والولاء ودي كلها رسايل مطلوبة من قطاع واسع من السعوديين .
والرسالة للخارج بتقول ببساطة أنا الرجل القوي الوحيد هنا .
