- ليه الفسيخ خطير ؟
لأنه بيسبب تسمم بكتيري خطير جدًا اسمه ” البوتيوليزم ” .. وهو حالة من حالات التسمم الغذائي القاتلة .. اللي بيسببها أحد أكتر أنواع البكتيريا السامة بالنسبة للبشر .. البكتيريا دي بتصيب الجهاز العصبي وبتسبب الوفاة فى خلال ساعات .
ليه المرض مرتبط بالأسماك ؟
لأن أهم سلالات البكتيريا اللي بتسبب حالة التسمم دي بتعيش فى الأماكن اللى فيها هوا قليل زي الطين بتاع البحر والنهر .. وبتقدر تكون حويصلات تعيش فيها وتحميها .. وطبعًا ممكن بسهولة تدخل مع الأكل إلى بطن السمك عشان تعيش جوه الأمعاء .. والاخطر إنها بتقدر تعيش وتطلع سمومها حتى فى درجات حرارة منخفضة .. على عكس درجات الحرارة المرتفعة اللي بتقضي على الميكروب ده ( أكتر من 70 درجة لمدة دقيقتين ) ..!!
- ليه الفسيخ بقه دونًا عن السمك كله بيعمل التسمم ده ؟
الموضوع مرتبط بطريقة التحضير .. عندك ميكروب عايش فى السمكة وإنت مبتنظفهاش من جوه عشان تعمل فسيخ حلو .. وعندك درجة حرارة بيحفظ فيها السمك بتساعد الميكروب ينمو لأنه مبتغليهوش ولا بتجمده .. وعندك الوسط الموجود فيه الميكروب اللي ممكن يساعده على النمو بدل ما يموته .. على سبيل المثال استخدام الملح لكن بتركيز عالي أكتر من المستخدم فى التصنيع ممكن يموت الميكروب .. أو إنك تخلي الوسط بتاع السمك ” حمضي ” وعشان كده في ستات بيوت بيغسلوا السمك بالخل لكنه للأسف مش كفاية .. وعشان كده هتفضل أهم خطوات الحماية إنك تشيل بطن السمكة و تغسلها كويس جدًا من جوه ومن بره ومتنساش منطقة الخياشيم .. دي آمن طريقة ..!!
- أعراض التسمم بالفسيخ ؟
الأعراض غالبًا بتظهر فى خلال 12 – 36 من الأكل .. يعني يوم الأكل بليل أو تاني يوم .. وأحيانًا بتظهر فى خلال 6 ساعات .. طبعًا فى حالة ظهور الأعراض دي متضيعش وقت واطلع على أقرب مركز للسموم جنبك .
– اضطراب الروية و زغللة
– صعوبة بلع
– صعوبة فى الكلام
– صعوبة فى التنفس
– ترجيع و اسهال
د/محمد طنطاوي
